Arizona arzusu - Arizona Dream

            Bu film haqqında yazmamaq mən tərəfdən yolverilməz bir şey olardı. Hər epizodunu böyük maraqla və diqqətlə izlədiyim bu film məndə çox böyük təəssüratlar dənizi yaradıb. İzləyənlərə bu film haqqında oxumaq, məncə, pis olmaz. İzləməyənlər də filmi izləsələr və ən əsası anlasalar, çox şey əldə etmiş olarlar. Qısaca süjet, sonra isə anladıqlarımı yazım. Əlbəttə ki, ən əsası sizin bilavasitə filmi izləməyinizdir. Bilirsiz, Norveç meşəsində də (Haruki Murakami) belə bir vəziyyət var idi. Bu filmi də izləyib bəyənədiyimə görə belə bir nəticəyə gəlirəm: nə istədiyini bilməyən, bir limandan o birisinə üzən sərxoş gəmi kimi qalmış insanlar və onların dramları mənim diqqətimi cəlb edir. Biri var, tragediya, faciə, yəni sonu çox kədərli və ürəkparçalayan film və ya kitablar, biri də var bir az daha yumşaq dram. Mən Aksellə birlikdə kədərləndim, dərdinə şərik oldum, sevindim, öyrəndim. Arizona arzusu məhz belə bir şeydi.

Süjet: Arzuların filmi – Leo əmi istədiyini əldə etməyi bacaran adamdır. O, istəyir ki, onun qardaşı oğlu, Aksel, onun toyunda şahid olsun və onun işlətdiyi firmada, Kadillak satsın. Aksel isə heç nə istəmir. Aksel yerli ruhi xəstə, Elen (kifayət qədər gözəl qadındır) və onun qızlığı Qreyslə birlikdə olmağı istəyir və onlarla birlikdə arzulara dalır. Kənarda qalmış Qreys, tısbağaya çevrilmək istəyir. Aksel özü isə Alyaskanın ucsuz-bucaqsız, geniş çöllüklərini və orada paltus balığı tutmağı arzulayır. Leo əminin arzusu isə Kadillaklardan «dağ» düzəltmək və onun üzərinə dırmaşmaqdır.

Aktyorlar rollarının öhdəsindən layiqincə gəlmişlər. Johnny Depp, Jerry Lewis və Faye Dunaway kimi adlar çox şeyi bildirir. Əlavə şərhə ehtiyac görmürəm. Eyni zamanda filmdə mütəmmadi olaraq qulaq asacağım soundtracklər kəşf etdim. 

Maraqlı faktlar:

-              Film çəkiliş zamanı 3 aylıq fasiləyə məruz qalmışdır. Belə ki, filmin rejissoru Əmir Kusturiça (Эмир Кустурица), vətəni Yuqosloviyada baş vermiş müharibə ilə əlaqədar depressiyaya düşmüşdür.  

-       Filmin ssenarisi, rejissorun tələbələrinin biri olan Devid Atkinsin hekayəsi əsasında hazırlanmışdır.

-    Conni Depp birinci dəfə Kusturiça ilə görüşəndə ondan heç xoşu gəlməmişdi, ona görə hətta filmdə də çəkilmək istəmirdi.

-               Conni filmin bəzi epizodları üçün eskimos dilini öyrənmək istəyirdi, amma Cerri Luis təklif etdi ki, elə danışaq ki, bu «sanki» eskimos dilidir.

-     Kusturiça filmi bir neçə il montaj edib.  Bəzi mükafatları qazanmasına baxmayaraq, belə qəbul olunur ki, film tam mənada uğur qazanmayıb. Bir çox kinomanlar isə hesab edirlər ki, film, Kusturiçanın ən uğurlu layihəsidir.

Filmi izlə/yüklə: buradan