Niftiyevin bloqu

"İkinci ev"ə doğru uzun səyahətə çıxan kosmik gəmidə yaranan texniki problemlər bir çox fəsadlar törədir. Sərnişinlərdən bir nəfər vaxtından tez, daha doğrusu 90 il zamanından öncə hiperyuxudan oyanır. Belə erkən "oyanış" hər nə qədər dəhşətli səslənib sərnişinləri ucsuz-bucaqsız kosmosun ənginliklərində başıboş buraxsa da, bir o qədər də təhrikedici macəralara səbəb olur...

Yenə də izlədiyim və bir o qədər də bəyənmədiyim son 3 film haqda söhbət açmaq istəyirəm. Filmlər haqda ayrı-ayrılıqda yazıb rejissorlarına fərdiyyət lüksu kimi hədiyyə vermək istəmirəm. Odur ki, gəlin qısaca olaraq "Room", "Steve Jobs" və "Mafiya: sağ qalmaq oyunu" filmlərinə nəzər salaq və onların müasir film həvəskarı üçün hansı səbəbdən yararsız olduqlarını başa düşək. 

''Casuslar körpüsü'' filmində hadisələr real tarixi faktlar əsasında baş verir və bruklinli sığorta vəkili Ceyms Donovanın diplomatik təşəbbüslərini əhatə edir. ABŞ-la Sovet arasında nüvə müharibəsi təlatümünü yaradan soyuq müharibənin episentrində özünü tapan sadə sığorta hüquqşünası Donovan, ABŞ-ın Mərkəzi Kəşfiyyat İdarəsi tərəfindən U2 adlı kəşfiyyat təyyarəsinin SSRİ ərazisində əsir götürülən amerikalı pilotunu, SSRİ-nin ABŞ-da həbs olunan kəşfiyyatçısı polkovnik Abel ilə dəyişdirmək tapşırığı alır. Könülsüz olaraq qəbul etdiyi bu tapşırıq əsnasında əlavə problemlər və əlavə məqsədlər işi daha da qəlizləşdirir. Buna baxmayaraq bütün çətinliklərə qalib gələcək yeganə qüvvənin insan sevgisi olduğu bir daha sübuta yetirilir. 

Digər analoji yazılarımdan fərqli olaraq bu dəfə 3 film haqqında bir yazıda bəhs etmək istəyirəm. İzlədiyim bu son 3 film məndə birmənalı təəssürat yaratmamaqla yanaşı, həm də ifadə edilərək geniş yazıya səbəb olacaq formatda hər hansısa bir təcrübə də yaratmadı. Gəlin sizə onlar haqda qısaca məlumat verim və təəssüratlarımı bölüşüm.

Qarşımızda 19-cu ərsin əvvəlləridi. Bir çox Amerika və Avropa şirkətləri kürk satışı ilə varlanmaq istəyir. Bu məqsədlə bir çox ekspedisiyalar təşkil olunur. Belə ekspedisiyalardan birinə də Hyu Qlass bələdçilik edir. Lakin onun başına bədbəxt hadisə gəlir. Meşədə ayının hücumuna məruz qalan Qlass, heyət tərəfindən sağ ikən ölü kimi qəbul olunmağa başlanır. Bu azmış kimi, Qlassın həyatında ikinci bədbəxt hadisə də baş verir. Qlassı qətlə yetirmək istəyən Fitzcerald onun oğlunu öldürür. Qisas almaq üçün mütləq sağ qalmalı olan Qlass üçün əsl mübarizəsi başlayır. 

Amerika məşhur futbolçuların növbə ilə ölümündən sarsılır. Müəmmalı ölüm dalğası heç kimə güzəştə getmir. Sirri açmaq isə gənc və istedadlı neyrocərrah, əslən nigeriyalı, amma ruhən amerikalı olan Bennet Omalunun üzərində düşüb. Sonradan aydın olur ki, heç də hamı acı həqiqətin üzə çıxmasında maraqlı deyil. Vaxtından tez sönən ömürlər, taptanan hüquqlar və inanılmaz sınaqlar...

Bu yaxınlarda Lonq Aylenddə yaşayan tənha ana Coyun hekayəsi ilə tanış olmaq şansı əldə etdim. Coyun həyatına kənardan olan quşbaxışı belə heç də ürəkaçan deyil: tamamilə xaos və monotonluq. Monotonluğa toxunan sehrli çubuq uşaqlıq arzularını və həqiqi taleni yuxudan oyadır. 

İkinci Dünya Müharibəsi. Çox istedadlı ingilis riyaziyyatçısı Alan Türinq, almanların Eniqma kodunu qırmağa çalışır. Eniqma kimi super sisteminin dilini axtarıb tapmaq inanılmaz dərəcədə çətindir. İngiltərə hakimiyyəti bu məqsədlə ölkənin ən yaxşı riyaziyyatçılarını, şahmatçılarını və proqramçılarını bir yerə yığır ki, insan təbiətinin ən qorxulu tərəfi qələbə çala bilməsin. Alim Alan Türinq məntiqi nəticə kimi belə bir şey təklif edir: Eniqma kimi möhtəşəm super sistemə malik maşınla yalnız ona oxşar digər maşın mübarizə apara bilər. Bir çox uğursuzluqlar və çətinliklərdən sonra Alan Türinq istəyinə nail ola bilir. Faşistlərin sirli dili çözülür və planları ifşa olunur. Bəşər tarixinin axını dəyişir.