Abramoviç prinsipi - Принцип Абрамовича. Талант делать деньги - Владислав Дорофеев, Татьяна Костылева

      Motivlər: Kitabda planetin ən varlı insanlarından birisi olan Roman Abramoviçin həyat yolundan bəhs edilir. O, dünya şöhrətini kapitalı ilə deyil, davranışları, şəxsiyyəti ilə əldə etdi. Çukotkada yeddi illik qubernatorluqda o, ölən regionu diriltdi, onun dəvəti ilə gəlmiş Guus Hiddinkin başçılığıyla hazırlaşmış Rusiya millisi isə Avro-2008-də bürünc mükafatçı oldu. Onun sayəsində ölkənin alüminium və maşınqayırma sənayesi, neft yataqlarının üçdə biri dövlət tərəfindən tam nəzarət altında alındı. Bəs onun prinsipləri nələrdir?

10 illik biznes fəaliyyətinə 18 milyard dollar. Bəs bu uğurun tələb etdiyi qurbanlar?
Abramoviç nadir Rusiya biznesmenlərindəndir ki, Yelçindən başlayaraq, Medvedevə qədər hakimiyyətlə münasibətlərini pozmayıb və stabil yol qət edib. Diqqətlə araşdırsaq ona bənzər digər kolleqalar isə çoxdan ölkə xaricindədirlər. 

Abramoviç və Çukotka: 2000-ci ildə Rusiyanın qubernatorluq tarixində çox maraqlı, əvvəlkilərdən tamamilə fərqli bir səhifə açıldı. Çünki Çukotka oblastında qubernatorluq vəzifəsinə Roman Abramoviç namizəd oldu. Bunu niyə etdiyini o, özünü yeni bir şeydə sınamaq istədiyini və yeni ideyalar ovunda olduğu ilə açıqladı. Eyni zamanda sadəcə çukçalara yazığı da gəldiyini dedi. Çünki Abramoviçin 90%-lik səs toplayaraq seçilməsindən sonra, çukçaların həyatı qarşıdakı 8 ildə inanılmaz dərəcədə müsbətə doğru dəyişdi. Müasir sivilizasiya ilə çukçaları, məhz Abramoviç tanış etdi. Əlbəttə seçkilərdən sonra bəzi federal nümayəndələr seçkilərin saxtalaşdırıldığını iddia etsələr də, Abramoviçin Kremldə olan yaxşı əlaqələri və dəstəyi hər şeyi həll etdi. Abramoviç sadə insandır. Əldə etdiyi hər nəaliyyətdən sonra “drive” (iftira və şərləmələr mənasında) yaşamasına öyrəşmişdi. İnsanlar onun sadəliyindən istifadə edirdilər.

SSRi vaxtında Çukotkanın öz strateji əhəmiyyəti var idi. Belə ki, o soyuq müharibə dövründə nüvə keşiyində dayanırdı. Soyuq müharibə qurtardı, Çukotka da unuduldu. Ekstremal iqlim şəraiti, neft və qaz yataqlarının, nəqliyyatın olmaması bu bölgəyə maraq qoymamışdır. Kim daimi donma bölgəsində işləyib, yaşamaq istəyər ki? Abramoviç istəyər. Abramoviç Çukotkada qubernator olduqdan sonra, uzun sözün qısası, müasir sivilizasiyanın izlərini məhz Abramoviç təmin etdi. Əlbəttə Abramoviçin öz şəxsi mənfəətləri də var idi. Belə ki, Çukotkaya gələrək, oranın qanunvericiliyinə əsaslanaraq, oraya daşıdığı şirkətlərinin vergilərindən böyük güzəşt əldə edir və onları 100% Çukotkanın inkişafına sərf edirdi (hətta daha artığını).

Chelsea: Abramoviçin adını çox adam nə Çukotkada keçirdiyi qubernatorluq nə də “Sibneft” və “Millhouse Capital”ın direktorluq vəzifələrindən tanıyır. Yəni, çox adam bəlkə də bilirdi ki, o, oliqarxdı, amma məhz İngilis Çelsi futbol komandasının alınması ilə o, bütün dünyada birmənalı şəkildə tanındı. Çelsinin alınması məsələsinə kitabda belə yanaşılıb ki, Abramoviç bu hərəkəti ilə özünə lazım olan bəzi İngilis yüksək təbəqə aristokratlarıyla əlaqə yaratdı (futbol kifayət qədər güclü vasitədir) və 2003-cü ildə Rusiyada başında fırlanan qara buludlara toplanmış diqqəti dağıtdı. Onun bu hərəkətinə görə bir çox Rus yüksək vəzifəliləri onu tənqid etsələr də, o, geri çəkilmədi. Eyni zamanda azsayılı qərb mətbuatına verdiyi müsahibədə də qeyd etmişdir ki: “Mən bütün bunları pul qazanmaq üçün etmirəm. Pul qazanmaq üçün mənim daha az riskli yollarım var”

Nəticə: Sözün həqiqi mənasında bu kitabı oxuduğuma məmnun oldum. Səhifələr çevrildikçə, Abramoviç şəxsiyyəti mənim beynimdə aydınlandı və özgə, yad birisi olmaqdan çıxıb, müəyyən və yaxın birisi statusunu qazandı. Kitabın ilk səhifələrində çox tərəddüd keçirsəm də, şadam ki, kitabı yarıda qoymadım. Çox şey öyrəndim və bu dinamik şəxsiyyətin həyat yolundan öyrəndiyim bəzi şeyləri öz həyatıma da tətbiq etməyə çalışacam. Nə də olsa Rusiya biznes mühiti ilə Azərbaycan biznes mühiti, qaydaları çox da fərqli deyil. Eyni qaydalar, eyni oyunlar. Əsas olansa, hər zaman ehtiyyatlı olmaq və daima münasibətlər şəbəkəsini genişləndirməkdir. Necə ki, bunu Abramoviç etdi. Necə ki, bunu potensial Abramoviçlər edə bilər. 

Kitabı oxu: buradan

Kitabı onlayn dinlə: buradan

Digər yazılarım: burada