21.12.12

Niyə dünyanın sonu?: Əlbəttə ki, bir neçə versiya var. Bir neçəsini araşdırmışam, amma mənim üçün ən ağlabatanı Anatoliy Vessermsnın dəfələrlə vurğuladığı bu fikirdir: «İnsanlar elə hesab edirlər ki, onların bu qədər problemini dünyanın sonu konsepsiyası həll edəcək. Dünyanın sonu və bütün problemlərin həlli. Qulağa yaxşı gəlir. Oturub çətinliklərə sinə gəlmək, onlarla üzləşmək, mütəmmadi olaraq psixoloji gigiyenaya əməl etmək isə qulağa yorucu və zəhmətli bir şey kimi gəlir.» İnsan kütləsinin 90%-i eynidir. İnsanlar bu qədər həvəslə öz problemlərini həll etsəydilər, məncə, yenidən doğulardırlar, nəinki, ölərdilər.

Tarixçə: 1000-ci ildə xristianlar, bu yuvarlaq təqvim ilinin dünyanın sonu olacağına inanırdılar. İnsanlar mülklərini ucuz qiymətə satdılar, sonra isə, «dünyanın sonu» baş vermədikdən sonra qat-qat baha qiymətə aldılar (Bu xəbər din adamlarının köməkliyi ilə yayılmışdır. O dövrdə belə xəbərlərə heç kim inanmazdı, əgər «din adamları». Dəstək verməsəydilər).

Xristian dünyasının keşiş və rahibləri növbəti dəfə, «dünyanın sonu olacaq» peyğəmbərliyi ilə, dünyanı 1492-ci ildə qorxuya saldılar. Peyğəmbərlik tam əks mənada gerçəkləşdi. Belə ki, X.Kolumb Atlantik okeanını keçdi və yeni dünyanı kəşf etdi.

KİV və 21 dekabr: KİV artıq kifayət qədər samballı müddətdir ki, insanların əlehinə işləyir. KİV-də qorxuducu, ürküdücü xəbər eşidib ən azından stress keçirdən insanlar azmı oldu? Elə birisi mənim anam. Uzun siyahı yaza bilərəm, amma KİV bu xaosun yaradılmasında iştirak etdiyinə görə özünü xoşbəxt hesab saya bilər. Mən isə deyirəm: “ayıb olsun!” Dünyada bu qədər insan yaşayır. Hamısı dünyanı, verilən xəbəri eyni cür anlamır. Məsələn, ABŞ-da Konnektiutda (Connecticut) anasını və 20 nəfər şagirdi öldürən 20 yaşlı gəncin bu hərəkəti etməsi, rəsmi olaraq açıqlanmasa da, elə məhz dünyanın sonu anlayışı ilə əlaqələndirilir. Onsuz da dünyanın sonu gələcəyini düşünmüş və axıra yaxın bir az «əylənmişdir».

İslam və 21 dekabr: Səmavi dinlərdə dünyanın sonu qiyamət günü kimi adlandırılır və bunun yalnız Allahın edə biləcəyi deyilir. Qurani-Kərimin surə və ayələrini öz həyatına düşünərək tətbiq edən və hadisələrə obyektiv yanaşan (təəssüf ki, belələri çox azdı) insanlar üçün 21 dekabr konsepsiyası, əlbəttə ki, absurd və əhəmiyyəti olmayan bir şeydir. Maraqlı bir faktdır ki, 21 dekabr anlayışı qərb dünyasında daha səs-küylü oldu, nəinki Şərqdə. Bu mövzunun elə mənbəyi yenə də qərb oldu. Tarix və nəticə yenə təkrarlandı.

Nəticə: Nəticə isə budur ki, 28 dekabr tarixidir və mən bu yazını yazıram. Dünyanın sonu istənilən an baş verə bilər. Məncə, oturub bununla əlaqədar düşünməkdənsə hər zaman vicdanlı həyat yaşamağa çalışmaq və planetimizin qayğısına qalmaq daha məntiqlidir. 21 dekabrı və onun timsalında dünyanın sonunu istəyən insanlar isə sadəcə zəif xarakterli insanlardır. Dünyanın sonunu insan yaratdığı problemlərlə gətirə bilər. Bunu istisna etmirəm. Hər halda nikbinəm ki, müsbət dəyişikliklər olacaq.