Viktor Pelevin - Həşəratların Həyatı - Виктор Пелевин - Жизнь насекомых

  Süjet: Süjet başlığına yazmağa çox şey tapa bilmirəm. Çünki əsərin konkret 3-5 obrazın hərəkətvericiliyi ilə süjeti, motivləri yoxdur. Əsər özü bir neçə fəsildən ibarətdir və müasir yazıçı olan Pelevin, həşəratların timsalında fəlsəfə, mistika, narkomaniya və sadəcə adi qadın həyatını təsvir edir. 

Təəssüratlar: İlk öncə əsərdə metaforaların nə ifadə etdikləri və məqsədlərinin nə olduqları ilə əlaqədar heç bir təsəvvürə malik olmursan, amma əsərin obrazları ilə birlikdə quyuda daha dərinə endikcə hər şey aydınlanır. İnsanlar və həşəratların möhtəşəm qarışığı...

Həqiqətən kimlərsə bütün həyatı boyunca torpaq qazır, kimlərsə peyindən kürəni itələyir, kimlərsə işığa doğru uçur (əsərdəki ən gözəl metamorfoz) və kimlərsə də qan içir. Onlar da elə insanlar kimi müxtəlifdirlər. Kitab başdan ayağa fəlsəfədir. Bir neçə fəlsəfə kitabının verə biləcəyini sizə verə bilər. Sadəcə fəlsəfə kitabı da deyil, ümumiyətlə kitab oxumaq təcrübəsi çox olanlar görəcəklər ki, bu kitaba neçə-neçə kitab sığışıb. Ona görə də kitab insanı düşündürür.  Müxtəlif həyati vəziyyətlərdə əsərin qəhrəmanlarının etdikləri nəticə çıxarılası və yadda saxlanılmalıdır. Bizlər də kosmosdan həşəratlar kimi görsənirik. Eh, Viktor Oleqoviç (Виктор Олегович) mən onsuz da az düşünürdüm, bir də bundan sonra kosmosdan baxanda görəsən “mən hansı həşərat kimi görünürəm?” sualına cavab axtarmağa başladım. Məni çox şeyə fərqli yanaşmağı öyrətdiz. Həşərat ya da insan, nə fərqi var ki?

Yəni belə deyək ki, əsərdə olan metaforaları, götürsək, qısa adları tam yazsaq və ata adını da əlavə etsək, biz insanlar, özümüzü görəcəyik. Əlbəttə burada qeyri-adi bir şey yoxdu. Yazıçı elə insanlara istinad edib bu əsəri yazıb. Eyni zamanda təbiət qanunları da pozulmayıb. Həşəratlara aid olan bir çox xüsusiyyət olduğu kimi təsvir edilib və baş verən hadisələr abstrakt qalmır. Yazıçı əsərin süjeti ilə oynamayıb. Obrazları yaradıb və onlara istiqamət verib. Biz bu əsərdə əsla qəddar marianetka oynadan yazıçı görmürük.

Tanış oldum: Мираж - Солнечное лето, Комбинация - Вишнёвая девятка, Комбинация – American boy mahnılarını mənə bu kitab tanıtdırdı və buna görə minnətdaram. Çox minnətdaram.

Nəticə: Nəticə belə oldu ki, mən əmin oldum ki, Viktor Pelevinin əsərləri mənim üçün meditasiya kimidir. Xüsusiylə bu əsərdə olan işığa olan istiqamət və “mən” kimi anlayışlar mənim üçün gəncliyimdə öyrəndiyim ən əsas düşüncə predmetləri olacaq. Bu yazıçının üslubuna, meodikasına həqiqətən heyran qaldım. “Həşəratların Həyatı” oxumağa dəyən və ləyaqətli ədəbiyyat nümunəsidir. Oxuduqca müəyyən yerə gəlib belə düşünürsən: “Axı elə mən də belə düşünürdüm. Mən də bunu axtarırdım. Mənim də aqibətim belə olacaq?”.

– Это жизнь, сынок, – ответил отец.

Kitabı onlayn oxu: burada
Viktor Pelevin – Omon Ra haqqında resenziyam: buradan oxuya bilərsən
Digər yazılarm: burada