Ziyarətçi - The Visitor

 Süjet: Dul qalmış yaşlı professor Walter Vale, Connecticutda darıxdırıcı həyat yaşayır. Yerli kollecdə sadəcə bir sinifə dərs deyir və musiqi istedadı olmamasına baxmayaraq pianoda ifa etməyi öyrənməyə çalışır. Walter New York universitetində “Qlobal Siyasət və İnkişaf” mövzusunda, həmmüəllifi olduğu məqaləni oxumaq üçün konfransa qatılır. New Yorkdakı mənzilinə çatanda o, görür ki, mənzilində yad insanlar var. Bu mənzilin onun olduğunu bildirməsinə baxmayaraq, Walter Suriyalı musiqiçi Tareka və onun Seneqallı küçə ticarətçisi sevgilisi Zeynəbə ev tapana qədər qala biləcəklərini deyir. Tarek Afrika barabanında ifa edir və Walter bu musiqi alətinə heyran qalır. Sonra baş vermiş hadisələr isə Walterin daxili dünyasını açığa çıxarır və dünya görüşünü dəyişir.

Təəssüratlarım: Bir dəfə köməyə ehtiytacı olana əl uzatmaq kifayət edir ki, heç insanın özünün də xəbəri olmadan necə onlarla insana kömək əli uzatdığını görürsən. Mehribanlıq, dostluq və sevgi filmin əsas anlayışlarıdır. Film bizə açıq-aydın göstərir ki, hisslərdən, anlayışdan məhrum hakimiyyət orqanlarının insan taleyi ilə əlaqədar yaranmış problemlərə, suallara müdaxilə etməsi zamanı nələr ortaya çıxır. İnsaniyyətin qəddar həyat şərtləri qarşısında necə də aciz olduğunu gördüm. Kimlərsə bunun yanından elə-beləcə keçir, kimlərsə yox. Birincisinə  biganədir. İkincisi isə hekayənin bir hissəsi olmasına baxmayaraq gücsüz ola bilər və əlindən bir şey gəlməyə bilər.

Son səhnə: Son səhnədə Walter metroda Afrika barabanında ifa edir. Buna sadəcə sıradan dapbadurub olaraq baxmamalıyıq. Diqqətlə dinləyək: o, hər vuruşuyla sanki baş vermiş hadisələrə öz üsyanını çatdırır. Ləyaqətli insanlar üçün bu dünyada yaşamağın necə də çətin olduğunu deyir, sözün həqiqi mənasında həyat eşqinin boğulmasından və “hakimiyyət”lərin insalarına necə də yad kimi yanaşmasını göstərir. Bəli filmin son səhnəsi, Walterin sözlə ifadə edə bilmədiyi şeylərin musiqi ilə bütün dünyaya necə  çatdırdığını göstərir. İllərdir o, bunu etməyə çalışırdı. İçindəkiləri sözlə xaric etməyi bacarmasa da, musiqi ilə etmək istəyirdi, amma alınmırdı. Son səhnə ilə o, eyni zamada çağırış da edir. Sanki, “ey insanlar, bir-birinizə biganə qalmayın! Baxın mənə! Neçə ildi yaşayırdım, amma həmişə yalnız idim! Çalışın hər zaman bir-birinizin yanında olun! Həyatın mənası bizim bir-birimizə olan münasibətlərimizdədir...”(filmin şüarı: Connection is everything).

Filmi izləmək istəsəz diqqətlə izləyin. Bu suala da cavab tapmağa çalışın: Ziyarətçi kim oldu? Hansı tərəf digərinə daha çox ehtiyac duyurdu? Digər bir maraqlı bir fakt isə, filmdə təkrarlanan "çox sağ ol"un sayıdır. Əgər saysaz çox təəccüblənəcəksiz.

Filmi online izlə (rusca): burada
Filmi online izlə (türkcə altyazılı): burada
Digər yazılarımla tanış ol: burada