Sağ qalmışlar - The survivors

Filmin rusca adı: Школа выживания
Filmin ingiliscə adı: The Survivors

Əvvəlki yazılarımda da qeyd etmişdim ki, Robin Williamsın bütün filmlərini izləmək kimi bir məqsədim var. Elə bu yaxınlarda bu filmi izlədim və gənc Robinin və təcrübəli Walter Matthaunun rollarının öhdəsindən necə də gözəl gəldiklərinin şahidi oldum. İlk öncə film mənə mənasız gəlirdi. Belə ki, 80-ci illərin komediyası, bürokratiya, militarizm, cəmiyyətin mövcud və gələcəkdəki durumu, kapitalizmin, cəmiyyətdəki fərdlərarası aqresiyyanın nəticələri göstərən bir film, lakin metroda, dərsdə bu film haqqında düşünərkən, bizi əhatələyən reallıqların necə də gözəl formada filmləşdirildiyi nəticəsinə gəldim.
Filmin daha ilk epizodlarından biz axsayan kapitalizm və onun yaratdığı sosial haqsızlıqlara məruz qalan insanları görürük. Daha sonra filmdə “Sağ qalmaq məktəbi” altında necə də insanların beyinlərinin yuyulduğunu və gələcəyin daha pis olacağına inandırıldıqlarını şahidi oluruq. Filmin sonunda bir çox məqam açığa çıxır və insanlar xeyli müddət necə də aldandıqlarının şahidi olurlar. Nəzərə alın ki, bütün bunlar komedik bir dillə izləyicilərə çatdırılır. Bu ucuz və senzuralı komediya deyil. 80-ci illərdə həqiqi mənada komediyanı hazırlamağı bacarırdılar. Şükürlər olsun ki, DVD, VHS və internet var ki, biz üstündən çox keçməsinə (29 il) baxmayaraq yenə də belə gözəl filmlərdən zövq ala bilirik.

Filmin sonluğu xüsusi diqqətə layiqdir. İnsanlar hara gedirlərsə gedsinlər, nə icad edirlərsə etsinlər, həmişə, hər zaman bir-birilərinin dəstəyinə ehtiyacları var. Qarşımıza çox problemlər çıxa bilər, çox çətinliklərdən keçə bilərik, çox düşüncələrə dala bilərik. Bütün hallarda bizə lazım olan real insan dəstəyi və köməyidir. Daha yaxşı həyat, daha yaxşı şərait üçün biz bir-birimizi yad kimi yox, doğma kimi qəbul etməliyik ki, təəssüf olsun ki, xüsusilə bizim cəmiyyətdə və digərlərində “necə edim ki, daha çox digərlərindən qoparım” fikri hakimdir. Baxaq görək, dünyamızın, cəmiyyətimizin gələcəyi hara gedir. Bəlkə həqiqətən də bizim “Sağ qalmaq məktəbi”nə ehtiyacımız var? Bunun üzərində ciddi olaraq fikirləşmək lazımdır. Filmin baş obrazlarından birisi olan Sonny Palusonun (Walter Matthau) dediyi bü cümlələr çox mənalıdır:

“Sizə nolub insanlar? Hamı bir-birini güllələməyə qərar verib. Siz burda çox vaxt keçirmisiz. Siz ümid edirsiz ki, ölkədə xaos olacaq və siz də öz məqsədləriviz üçün canlı insanları kağız məqsədləriniz kimi güllələyəcəksiniz. Siz pul qabında dəlik açmaq kimi asanlıqla insan öldürə bilərsiz. Dəli olmusuz? Ən yaxşısı bir –birivizi güllələyin. Birinci məndən başlaya bilərsiz. Çünki əgər siz bizim gələcəyimizsinizsə, mən orada olmq istəmirəm. İstəmirəm!”

Filmi online izlə: buradan
Digər yazılarım: burada