Təmənnalı dostluq - Friends with Benefits - Секс по дружбе

        Təəssüratlar - Təəssüratlar filmin özü kimi normaldır. Süjet adidir və məncə, belə də olmalıdır. Aktyorlar qane edir. Timberleyki bəyənməyənlər çoxdu, amma mən onu bəyənirəm. Adətən o, pafossuz və artıq-əskik mimikasız rolların öhdəsindən gəlir ki bu da, zənnimcə, filmə təbiilik verir. Mila Kunis da öz yerində. Rola çox yaraşıb. Sadəcə düşünürəm ki, filmdə probel - ara məsafəsi azdı. Bəzi səhnələr dalbadal tez-tez, dinamik və həzmə imkan vermədən çəkilib. İzləyicinin sinir sistemi sürətli işləyirsə filmi anlamaqda bu ona çox kömək olacaq
       Dilan və Ceminin dostluğunu olduqları şəhərlərin dostluğu kimi də qəbul etmək olar. Filmdə bu açıq-aşkar bildirilməsə də, açıq-aşkar görmək olur ki, Los Ancelas və Nyu York müqayisə olunur. Los Ancelas Dilanın, Nyu York da Ceminin şəxsiyyətlərinə və onun bir parçası olan xarakterlərinə tam uyğun gəlir. 

        Qadın və kişi dostluğu - Müxtəlif yanaşmalar var. Bəzilər mümkün olduğunu, bəziləri isə mümkün olmadığı deyir. Əslində isə bu mövzuda ümumi yanaşma düzgün deyil. Belə deyək, bir kişi və ya bir qadın üçün əks cinsin müəyyən qrup nümayəndələri ilə dostluq mümkün ola bilər, müəyyən qrupları ilə isə mümkün ola bilməz. Nəticədə pozitiv və neqativ olmaqla iki böyük - nəhəng qrup əmələ gəlir.    

 Bəs cinsi münasibətlər? Mentalitimizin nəticəsi olaraq bu bizim cəmiyyətdə ancaq ər və arvad arasında olmalıdır. Ona görə də əlavə qruplar haqqında fikir demək bir çoxları üçün çətin deyil - cavab əxlaqsızlıq kimidir. Çox qəribə mövzudur əslində. Sevgili və ailəni başa düşürük, bəs yaxşı qadın və kişi dostlar arasında bu ola bilərmi? Film də məhz bunun üzərində inşa edilib. 

     Baş qəhrəmanlar cinsi həyatsız yaşamağın çətin olacağını və sadəcə formal xarakterli cinsi həyat yaşamağa qərar verirlər. Fiziki bədən, emosiyasız. Sadəcə fizki və psixoloji ehtiyaclar. Onlar hətta virtual İncilə də and içirlər. 

    Sevgi, dostluq və seks bir-birilərindən ayrıdırlarmı? Sevgi və dostluq, sevgi və seks, dostluq və seks kimi kombinasiyalar haqqında kitab yazmaq oar.

       Ata ilə oğul - Sözün həqiqi mənasında filmin pik nöqtəsi mənim üçün məhz bu səhnə oldu. Dilanın atasını səmimi qəlbdən qəbul edib onunla şalvarsız yemək yeməsi (atası alhzeymer xəstəsi olduğuna görə tez-tez belə gözlənilməz hərəkətlər edirdi). Bunu o, bəlkə də əvvəllər etməzdi, amma Ceminin məsləhəti ilə o, dəyişməyi bacardı. Valideynlərimiz və sevdiyimiz insanlar necə olurlarsa olsunlar, onlara kənardan necə baxırlarsa baxsınlar, əsas məsələ bizim onlara olan münasibətimiz və sevgimizdir. Digər insanlar deyil, məhz bizim yaxınlarımız bizim üçün önəmlidirlər və həmişə yanımızdadırlar.  

         Qəribə bir şey yadımda düşdü. Bir dəfə bir psixoloji seminarda qəribə bir nəfər komplekslərdən azad olmağı belə izah eləmişdi: "İnsanlar dovşandır. Dovşan. Digər insanları dovşan kimi təsəvvürünüzdə canlandırın və onları əzin. Çubuqla əzin". Əlbəttə bu hətta təsəvvürdə belə olsa qəddar bir şeydir. Biz həmin an bu insana qəribə baxdıq. Bəlkə də həmin insanın şəxsiyyəti elədir ki, bu ona kömək edir, amma normal insana az kömək edə bilər. Bəlkə də edə bilər. Bilmək olmaz. Hər halda digər insanlar və mən mövzusu ortaya çıxanda həmişə bu yadıma düşür. 

      Nəticə - Janr etibariylə "Təmənnalı dostluq"-da böyük yeniliklər yoxdur. Gözəl əhval-ruhiyyə, xoş emosiyalar, romantika, maraqlı dialoqlar, gözəl Los Ancelas və yumora görə filmi izləməyə dəyər. Sadəcə bu da deyil. Yuxarıda qeyd etdiyim mövzular ətrafında düşünmək kimi filmin ikinci dalğada gətirdiyi təəssüratları da qeyd etmək olar. Ona görə də bütün bu komplektlər izləyici darıxmağa qoymaz və vaxtını maraqlı keçirməyə səbəb olar.