Külək güclənir - The Wind Rises - Ветер крепчает

Külək güclənir animesi səma xəstəliyinə düçar olub, həyatdan səmada qanadlarla uçmadan getmək istəməyən uşağın həyat hekayəsidir. Bu həyat hekayəsində biz yuxular və arzular dünyasının “real” həyatımızla necə əlaqədar olduğunu, onun bizim bu günümüzə, dünənimizə və gələcəyimizə necə təsir etdiyini əla görürük.

Əsəri uşaqlar üçün adlandırmaq çətindi və deyərdim ki Yapon animeləri arasında belə nümunələr az deyil. Bu kifayət qədər yetkin insanlar üçün nəzərdə tutulmuş, diqqətlə izlədikdə onlara arzular və insanın həyatda yeri haqqında düşünməyə vadar edəcək bir ekran əsəridir. 

   Baş qəhrəman Dziro Hirokisi uşaq yaşlarından təyyarələr haqqında gecə və gündüz düşünmüş, təyyarələr haqqında yuxular görmüş və pilot olmaq istəyirdi, lakin zəif görmə ona pilot olmaq arzusunu reallaşdırmaqda mane olurdu. Yuxunun sehrli dünyasında o, başa düşür ki, pilot olmasa da, aviomühəndis ola bilər. Ölkəsinin (Yaponiyanın) ağır vəziyyətinə və şəxsi ailə dramına baxmayaraq o, öz arzusuna doğru inamla addımlayır. Öyrənəndə də ki, Dziro Hirokisi real tarixi şəxsiyyət olub, çox təəccübləndim. Real tarixi şəxsiyyətin animeyə belə gözəl tətbiqi heyranedicidir.

Filmin digər qəhrəmanı Yaponiyanın özüdür (birinci və ikinci dünya müharibəsi arasındakı zaman kəsiyindəki Yaponiya). Kasıb, lakin müdafiə gücünü artırmaq üçün böyük miqdarda vəsaitlər xərcləyən Yaponiya. O Yaponiya ki, əhalisini isti yeməklə təmin edə bilmir, Almaniyadan müdafiə üçün təyyarələr alır, insanları gec saatlara qədər qəpik-quruş uğrunda işlədir. Dziro bütün bunları gözəl başa düşür, amma dövlətə qarşı çıxmaqda da bir məna görmür. Odur ki, Yaponiyanı sevən, onunla nəfəs alan, onun mədəniyyətini, ədəbiyyatını, fəlsəfəsini sevən insanlar üçün nəzərdə tutulmuş anime ilə qarşı-qarşıyayıq.

Məgər bizi insan edən bizim arzularımızı, bizim başımıza gələn sevincli və kədərli hadisələri içimizdə cəm edib daxilimizdə harmonizasiya etmək xüsusiyyətimiz deyilmi? Arzulayan insan. Arzuları olan insan. Xüsusilə uşaqlıq arzuları. Həyatımızın əsas sınağı, imtahanı məhz bizim uşaqlıq arzularımızın arxasınca gedib getməməyimizidir.