Həyat açarı - Ключ жизни - Key of life

         Sakuray adlı uğursuz gənc aktyor, intihardan öncə ictimai hamamda yaxşıca çimmək qərarına gəlir. Kondo adlı çox zəngin birisinin hamamda sürüşərək yıxılıb yaddaşını itirməsi Sakuray üçün bəzi yeni fikirlər qazandırır. O, Kondonun şkafının açarını özünkü ilə dəyişdirərək, bir müddətlik Kondo olur. Bir növ müəyyən müddətlik yeni nəfəs əldə edir, lakin yeni problemlər qazanır desək, daha doğru olardı.

         Film ilk dəqiqələrdən izləyicidə qara yumorun yaratdığı qəribə hissləri yaradır. Mən ilk dəqiqələrdən “İroniya” sözünün bu filmə necə də tam uyğum gəldiyini başa düşdüm. Ədəbiyyat və kinematoqrafiya talelərin yerdəyişməsi və dəyişməsi haqqında nümunələrlə az tanış olmasa da, rejissorun uğurudur ki, bu mövzuya müasir yeni nəfəs qazandırmışdır. Səmimi, rahat və axıcı film.

            Kəsişmə və ayrılma – Filmdə obrazların həyatları həm kəsişir, həm də ayrılır. Uğursuz aktyor müəyyən müddətlik killer olaraq aktyorluq bacarıqlarını yenidən kəşf etmək üçün şans əldə etmiş olur. Sadəcə bu da deyil. O, eyni zamanda həyatın necə dəyərli olduğunu da başa düşür. Kondo – killer isə müəyyən müddətlik pul qazanmaq ehtirasından kənar qalaraq, sevginin qapısını döyür.

          Görəsən insan hansı vəziyyətə və ya vəziyyətlərə düşməlidir ki, daxilində gizlin qalmış xüsusiyyətləri kəşf etsin və həyatda daha sevgi dolu və insancıl olsun. Müxtəlif şəxsiyyətli insanlar müxtəlif cür hadisələr yaşayaraq dəyişirlər. Eyni hadisə kimlərəsə kömək edə bilər ki, o, daha məqsədyönlü və inamlı olsun. Bir başqasına isə əksinə, mənəvi cəhətdən sındıra bilər.

           Yaxşı ki... – Yaxşı ki, Kondo ictimai hamamda yıxıldı. Çünki beləliklə Sakuray, sözün həqiqi mənasında, həyata qızıl açar qazanmış oldu. Yaxşı ki, Kondo aşiq oldu, çünki belə olmasaydı bütün həyatını pulun yaratdığı heçlik içində yuvarlanıb yaşayacaqdı. Yaxşı ki, bəzən həyatda bəzi hadisələr olur. Əks-təqdirdə insanlar filmdə də göstərildiyi kimi, sadəcə plan və qrafikə uyğun olaraq həyat yaşayıb bir çox şeydən məhrum olardılar. Yaxşı ki, xoşbəxt sonluqlar var. 

filmi izlə