Old Dogs - Так себе каникулы

         İki köhnə dost və iş ortağı əvvəllər birliktə etdikləri “dəcəllik”-lərə görə, iki əkiz uşağın məsuliyyətini üstlənib, tərbiyəsi ilə məşğul olmaq məcburiyyətində qalırlar. Bu gözlənilməz sürpriz olur. Onlar uşaqların qayğısına qalmaqla yanaşı, vacib biznes partnyorluğunun qurulması ərəfəsində, uşaqların nazlarını çəkməli, onları yay düşərgəsinə aparmalıdırlar. Orada onların başlarına nələr gəlir nələr. Müxtəlif maceralar qarşıda onları gözləyir. Onlar bu heç də asan olmayan missiyanın öhdəsindən gələ biləcəklərmi?

         Travolta və Uilyams dueti olduqca maraqlıdır. Hər ikisi də öz sənətlərinin parlaq nümayəndələridirlər. Bu filmdə yaratdıqları obrazlar müxtəlif xüsusiyyətləri özündə birləşdirirlər. Lakin film və aktyorların ifası heç də təbii alınmayıb. Bu cür aktyorların mənasız ssenaristlərin kəlləsində itib-batmış, anlaşılmaz, sözdə yaxşı komedik filmdə iştirak etmsi məni məyus etdi. Ailə-məişət problemləri və biznes əlaqələri fonunda çəkilən film, olduqca amerikansayağı süniliyi ilə zəngindir. Rejissor Uolt Bekerin bu iki meqa-aktyoru işə cəlb etməsinə baxmayaraq öz bacarıqsızlıq və istedadsızlığını göstərib (Onu bağışlamaq olarmı?). Başqa filmlərini izləməsəm də bu film də bir çox məlumatı bizə ötürür. Heç filmin adı da doğru seçilməyib və rus dilinə də düzgün tərcümə olunmayıb (Так себе каникулы). “Old Dogs” – bilmək olmur ki, izləyicini nə gözləyəcək. Yaş böhranı? Ailə problemləri? Dostluq? Sevgi? Yoxsa heyvanlar aləmi?

         Gülməli epizodlar çox az oldu. Doğrudur, həmin epizodlar uzun müddət yadımdan çıxmayacaq. Yenə də azdan-çoxdan yaradıcıllıq var. Sadəcə lazımi mühitin yaradılmasında problemlər görürəm. Bilmirəm, bəlkə də bu mənə belə gəlir, çünki başqa resenziyalara baxanda filmi 10 ballıq şkala üzrə 10 qiyməti ilə qiymətləndirənləri gördüm. Əlbəttə, rənglər və zövqlərdə......

         Filmdə hər şey anidən və sürətlə baş verir ki, bu heç də yaxşı deyil. Ümumiyyətlə filmin süjeti hər nə qədər dinamik olursa da olsun, statik epizodlar da olmalıdır ki, izləyici yüklənməyə məruz qalmasın. Bu filmdə hər iki katerqoriya da oldu, amma harmoniya görmədim. “Old Dogs” filmi mənim üçün elə də dəyərli film olmadı. Sual versəz ki, bəs biz necə, izləyək yoxsa yox. Cavabım belə olardı ki, Con Travolta və Robin Uilyamsa və bəzi maraqlı və gülməli epizodlara görə izləməyə dəyər. Bilmək olmaz, bəlkə sizün üçün çox mənalı, maraqlı və dəyərli film olacaq.