Rolf Dobelli - Məntiqli düşünmə sənəti

Rolf Dobelli

Rolf Dobelli - The Art of Thinking Clearly

Müəllif haqqında - Rolf Dobelli 1966-cı ildə anadan olmuş, St Qallen Universitetində doktorluq dərəcəsi almış, "Swissair" aviasiya şirkətinin müxtəliq qız cəmiyyətlərində çalışmış və dostları ilə birlikdə dünyada məşhur olan iqtisadiyyat üzrə ədəbiyyatları yenidən redaktə edilmiş mətnlərlə ümumiləşdirən və satışa çıxaran "getAbstract" firmasının əsasını qomuşdur. O, Honkonqda, Avstraliyada, İngiltərə və ABŞ-da yaşamışdır. Rolf Dobelli dünyada elm, mədəniyyət və iqtisadiyyat üzrə şəxsiyyətlərin cəmiyyəti olan "ZURİCH MİNDS"-in kuratoru həm də banisidir. O, 33 yaşında ədəbiyyat aləminə atıldı və yazarlıqla məşğul olmağa başladı. Bu vaxta qədər yazarın "Diogen" nəşriyatında altı kitabı nəşr olunmuşdur. Rolf Dobelli İsveçrənin Lutsern şəhərində yaşayır. 

Annotasiya əvəzinə - Bizim beynimiz həyatımız boyu ovçu və yığıcı təfəkküründə formalaşıb. Bu gün isə biz tamamilə başqa radikal dünyada yaşayırıq. Bu isə bizi pul, karyera və öz xoşbəxtliyimiz barədə məhvedici nəticəyə gətirib çıxara bilən sistemli məntiqi səhvlər buraxmağa vadar edir: Rolf Dobelli bizim həmişə həyat girdabında batıb qalmağımız ən "xoşagəlməz" məntiqi səhvləri lupa altında çəkir: biz nəyə görə (başqalarını özümüzdən ağılsız hesab edərək) öz şəxsi biliklərimizi sistemli olaraq daha yüksək qiymətləndiririk; nəyə görə bir sıra məsələləri milyonlarla insanın düzgün hesab etdiyi üçün biz də düzgün hesab edirik; nəyə görə biz nəzəriyyələrin özləri belə yanlış olduğu halda nəzəriyyələrin izinə düşürük. 

Şəxsi təəssüratlarım (problemlər) - Diqqətimi cəlb edən bu kitabı alıb oxuduqdan sonra yaranmış təəssüratlarım haqqında danışmaq da kifayət qədər məntiqlidir. Kitabı oxumazdan öncə kitabdan olduqca böyük tələblərim var idi. Tələblərim müəyyən qədər ödənilsə də, kitabdakı tərcümə problemləri məni usandırırdı. Alman dilindən tərcüməni reallaşdıran Şiraslan Yusubluya təşəkkür etsəm də, təcrübəsinin az olduğunu deməkdən çəkinmirəm. Çünki kitab tərcümə baxımından olduqca həssas yanaşma tələb edir. Hər bir yeni fəsildə yeni terminoloji söz birləşməsi istifadə olunur. Bu terminoloji söz birləşmələrinin düzgün və səlist tərcüməsi çox vacibdir. Bu məqamda tərcüməçi tamamilə hərfi tərcümə prinsiplərinə əsaslanıb və məlumatların assosiasiyasını pozub. 

Şəxsi inkişafa yönəlik kitabların ortaq xüsusiyyəti fırıldaqçılıq olsa da, "Məntiqli düşünmə sənəti" intellektual məlumatlar, emprik təsvirlər və maraqlı nəzəriyyələrlə zəngindir. Bütün bu sadalananların gündəlik həyatımızla əlaqələndirilməsi və qaranlıq məqamlara işıq salınması Rolf Dobellinin uğurudur. Bu baxımdan kitabı şüur dəyişdirici xüsusiyyətdə olduğunu qeyd etmək olar ki, bu da onun əhəmiyyətinə verilən işarədir. 

Mən uşaqlıqdan bu yana şəkilli kitabları çox sevirəm. Kitablarda illüstrasiyaların olması çox əhəmiyyətlidir. Neçə-neçə insanın dünya görüşü və düşüncə tərzi uşaq yaşlarında oxuduğu "şəkilli kitablar"-ın əsasında yaranıb. Yaşımız artsa da, yenə də şəkilli kitablar əhəmiyyətlidir. Belə hesab edirəm ki, beynimizin sol və sağ payı arasında olan uçurumun azaldılması üçün bu əvəzsiz vasitədir. "Məntiqli düşünmə sənəti" şəkilli kitab statusunu daşıyaraq yaradıcı təfəkkürün inkişafına kömək edəcək illüstrasiyalarla zəngindir. 

Bəli kitabı oxumağa dəyər. Tərcümədə problemlərin olmasına baxmayaraq belə kitabı oxuduqdan sonra əhəmiyyətli dərəcədə dəyişikliklər etmək mümkündür. Eyni zamanda kitab sadəcə bir dəfə oxunulacaq formatda da deyil. Müstəqil 52 başlığın olması sizə imkan verir ki, siz istənilən vaxt 3-4 səhifədən ibarət məlumatları bir daha oxuyub onları daha yaxşı dərk edəsiniz. 

Nəticə olaraq onu deyim ki, ensiklopedik xüsusiyyətə malik "Məntiqli düşünmə sənəti" sizi bir çox yöndən inkişaf etdirə bilər.