Mirzəkərim Norbekov - Kuzyanın anası haradadır və ya milyonlarla əhlikef çıxış yolunu necə tapaq? - Мирзакарим Норбеков - Где зимует кузькина мать, или Как достать халявный миллион решений
Budur şəhərin məşhur kitab mağazasında kitab
rəflərinin arasında gəzişirəm. Qəribə tərzdə, canayaxın formada üzümə
gülümsəyən bu qəribə adamın kitabının arxasında mənə ünvanladığı yazıları
oxuyuram. Ən əsası isə adı cəlb edir: Mirzəkərim. Öz-özümə fikirləşirəm ki,
şərq insanının dilini elə şərq insanı bilər. Nə qədər ola bilər ki, şərq insanı
elə şərqli problemlərini həll etmək üçün Qərbə müraciət edir. İnanın bu
elə-belə bölgü deyil. Bu adam bəlkə də nəyəsə nail olmağı bacarıb və digər
insanlarla da bölüşməyə qərar verib. Odur ki, bu kitabı oxusam nə isə əldə
etmiş olaram. Kitabı alıram və ən qısa müddət ərzində böyük ümidlərlə oxumağa
başlayıram. Başlasam da, sonlandırmağa çox çətinlik çəkirəm.
Yəqin ki, həm mənim yazılarımda, həm də digər
təcrübəli yazarların təəssüratlarında şəxsi inkişaf kitablarının necə
əhəmiyyətsiz olduğu haqqında məlumat almısız. Bu dəfə sadə şəxsi inkişaf kitabı
ilə qarşı-qarşıya olmadığımı düşünürdüm, lakin bu belə olmad.Mirzəkərim də söz
oyunundan başqa heç nə təqdim edə bilmədi.
Kitabın ilk səhifələrində kitabın üslubu
haqqında məlumat almaq olur: düşünən insanın gündəlik problemlərinin fəlsəfi
şərhi. Bir çox düşünən insanlar həyatlarının xaotik olduğunu, hamı kimi olmadıqlarını
deyirlər. Bundan qorxurlar və çıxış yolları tapmaq üçün ya belə kitablara, ya
da bu mövzu ətrafında fəaliyyət göstərən psixoloq və mütəxəssislərə böyük
ümidlərlə müraciət edirlər. Mən də belələrindənəm. Həmişə kitab mağazalarını
böyük ümidlərlə gəzirəm ki, bəlkə bu dəfə qarşıma həyatımı dəyişdirəcək kitab
çıxacaq. Nədənsə uzun zamandı ki, qarşıma belə kitab çıxmır.Həyatımı
dəyişdirəcək demək əslində dəqiq ifadə olmasa da, ümidlərimin əhəmiyyətini izah
etmək üçün bu ifadənin istifadəsini bu dəfəlik məqbul hesab etmək olar. Bütün
bu dediklərimi məhz bu kitaba tətbiq etsək belə nəticələrə gəlmək olar:
Müəllifin müəyyən müddətdən sonra insanlara çatdırdıqları məsələlər
əsaslandırılmamış və əhəmiyyətsiz mövzulardır. Müəllifin öz şəxsi fikirləri,
təcrübələri müəyyən anlıq olsa da, maraqlı gəlir, amma oxucu daha çoxunu
gözləyir, əvəzində isə bunu ala bilmir. Yenilik yoxdur, çünki təhsil sisteminin
tənqidi, sağlamlığın düşüncələrimizdə gizli olduğunu və intuisiyanın oyadılması
üçün isə çalışmaq lazım olduğunu öyrənməkdə heç bir yeni bir şey yoxdur.
Müəllif yumor istifadə etmək istəyib, amma nəticədə kobud və banal zarafatlar
və bir yığın sözlər ortaya çıxıb. Bir sözlə alınmayıb.
Belə kitablar haqqında çox danışmağa dəyməz.
Ortada nə nəticə var, nə də nəyəsə çağırış. Sadəcə spontan məsələlərə müəyyən
yanaşmalar. Sərf olunan vaxta dəymir.
Comments
Post a Comment