Ən yaxşı vaxtlar - The Best of Times

Filmin ingiliscə adı: The Best of Times

Filmin rusca adı: Лучшие времена

İl: 1986

Janr: komediya, idman, dram

Filmin şüarı: A film with a catch (or two)

Rejissor: Roger Spottiswoode

Aktyorlar: Robin Williams, Kurt Russell, Pamela Reed, Holly Palance

Mükafatlar:          ---

Süjet - Mərkəzdən uzaq Kaliforniya şəhərciyi olan Taft, sadəcə öz neft sənayesi və həmişə məğlub olan futbol komandası ilə məşhurdur. Bu şəhərcikdə Cek Dandi yaşayır. Bu insan 15 il bundan öncə həm özünə, həm də komandasına böyük biabırçılıq yaşatmışdır. İndi isə tarixi yenidən yazmaq qərarına gəlir. Lakin onu nə şəhər sakinləri, nə də dövrünün ən məşhur və istedadlı oyunçusu Rino Haytauer dəstəkləmir. Onlar eyni hissləri və amalları paylaşmırlar. Bəs yaxşı Cek yuxulu şəhərciyi oyadıb tarixi yenidən yazmağa müvəffəq olacaqmı?

         Fikirlərim – Ümumiyyətlə furbol həvəskarı deyiləm. Hələ üstəlik də Amerika furbolunun heç fanatı deyiləm. Adətən idmanla əlaqədar olan dram/melodram/komediya/triller kimi filmləri də sevimrəm. Çünki ssenari eyni olur: bir və ya bir qrup uğursuz oyunçular cavab oyununda qalib gəlirlər. Bu filmə isə üç səbəbə görə baxdım. Birinci səbəb  Robin Vilyams, ikinci səbəb Kurt Rasseldir və nəhayət üçüncü səbəb isə filmin ilidir. Adı çəkilən aktyorların əlavə şərhinə ehtiyac görümürəm. Onları tanıyanlar tanıyır. Filmin ili isə 1986-dır. 80-ci illərdə, həqiqətən də, çox gözəl filmlər çəkilirdi və o dövrün filmlərinə qarşı xüsusi simpatiyam var.

         İdmanla yumorun sintezi və kiçik, mərkəzdən uzaq, letarqik yuxuya qərq olmuş şəhər mühitinin yaradılması kifayət qədər uğurlu alınıb. Fikrimcə, filmi izləyənlər çətin ki, filmdə hansısa mənasız, lazımsız, uyğunsuz və beldən aşağı epizodlar tapsın. Ona görə də, hesab edirəm ki, filmi tənqid edəcək hansısa məqam yoxdur. Səmimi və olduqca pozitiv filmdir. Belə filmlərdə mən ürəkdən gülürəm. Robin Vilyams həmişə komediyaya xüsusi çəki, xüsusi dəyər qazandırır. Bu aktyor hər zaman əlində olan bütün imkanlardan maksimum istifadə edir. Kurt Rassel isə, filmə klassika ətri qatıb. Odur ki, film hansısa ucuz bir ekran əsəri hesab edilə bilməz.

         Filmin obrazları çox maraqlıdırlar. Maraqlı olduqları qədər də oxşardılar. Belə ki, hamısı xatirələrlə, keçmişləri ilə yaşayan uğursuz insanlardı. Bəziləri isə sadəcə canlarını qurtarmaq istəyir. Bəziləri isə təsəlli tapır. Cek Dandi isə sadəcə uğursuz deyil, o, uğursuz-inteligentdir. O, rahat yaşaya bilmir. Səbəb isə kabus kimi xatirələridir. Lakin o, təslim olmur və həm özünə, həm də bu kiçik şəhərə ümid verir. Əlbəttə, tipik amerikan filmlərinə xas həppi-endinq olosa da, izləməyə dəyər. Şəxsən mən filmiz izləmək üçün üç səbəb göstərdim. Siz də özünüzə görə səbəb tapa bilərsiz.

P.S. İmdb reytinqi 5.6-dır (23.04.13). məncə, filmin qiyməti 6.0 ilə 6.7 arasında olmalıdır. Nə artıq nə də əskik.