Mingür Rinpoçe - Budda, beyin və neyrofiziologiya. Həyatı yaxşılığa doğru necə dəyişək. - Йонге Мингьюр Ринпоче - Будда, мозг и нейрофизиология счастья. Как изменить жизнь к лучшему

Budda deyir: Necə ki, qızılı əridib, döyüb və kəsib keyfiyyətini yoxlayırlar, müdrik rahib də mənim təlimlərimi yoxlamalıdır. Mənim təlimlərimi necə lazımdırsa elə də öyrənin, təhlil edib başa düşün. Heç vaxt onları inanc kimi qəbul edib, kor-koranə qəbul etməyin.

Məşhur Tibet ustadı Mingür Rinpoçe bu kitabı ilə müasir elmin nəaliyyətləri və buddizm fəlsəfəsini birləşdirərək, meditasiya vasitəsilə daha xoşbəxt yaşamaq haqqında inanılmaz dərəcədə praktiki və gözəl məsləhətlər verir. Mingür Rinpoçe şəxsən Dalay Lama tərəfindən, Veysman universitetinin neyrofiziologiya və beyin funksionallığı laboratoriyasında aparılan təcrübələrdə iştirak etmək üçün seçilmişdi. Təcrübələrin nəticələri inanılmaz idi: təcrübə ərzində beynin xoşbəxtliyə cavab verən neyroloji hissələrində neyron aktivliyi 700-800 faiz artmışdı. 

Bütün qorxuların səbəbi, iztirablardan azad olmağı və xoşbəxt olmağı istəyən sizin kimi canlıların, sizinlə harda və necə qarşılaşmaqlarından asılı olmayaraq, sizdən az fərqləndiyinin dərk edilməsindədir. 

Rinpoçeni Tibetdə doğulan buddizm günəşi adlandırmaq olar. O, kifayət qədər cavandır. Belə ki, o, 1975-ci ildə anadan olmuşdur. Sadəcə buddizm deyil, müasir elmin nəaliyyətlərini də dərindən bilir. Öz kitabında olduqca yumoristik və canayaxın dillə meditasiya, insan beyni və sinir sistemi haqqında məlumatlar verir. "Ağlınızda yaranan fikirlərə istənilən anda diqqət yetirməyiniz meditasiyadır."

Bizim "mənim özüm", "mənim şüurum", "mənim bədənim" adlandırdığımız anlayışlar əslində fasiləsiz olaraq düşüncə, hiss və qavrayışlar axını vasitəsi ilə yaranan illüziyadır. 

Kitabı oxuyanda Oşonu xatırlamamaq olmur. Oşonun nitqlərində də meditasiya dəfələrlə vurğulanır və təbliğ olunur. Kifayət qədər Oşo həvəskarı olduğumdan meditasiyanın əhəmiyyəti haqqında lazımi dərəcədə məlumatım var idi, lakin bu kitab mənim üçün tam fərqli və tam yeni üfüqlər açdı. Kitabı sadəcə elmi-populyar janrda qiymtələndirmək olmaz. Bu eyni zamanda oxuduğum ən faydalı şəxsi inkişaf janrının nümayəndəsidir. Sözün həqiqi mənasında, kitabı oxuduqdan sonra ciddi biliklər əldə etdim. Adətən bu formatlı kitablar oxucuya qalıcı biliklər təqdim etmir, amma bu kitab belə deyil. Əldə olunan bilikləri praktikada tətbiq etmək kifayət edir ki, müəyyən nəaliyyətlər əldə edilsin. Məncə, bir kitaba aid ediləcək ən gözəl sözlərdən birisidir. 

Müvəqqətilik nisbi reallıqda daimi olan yeganə məsələdir. 

Meditasiyanı dərk etmək heç də asan iş deyil. Dünyada milyonlarla insan meditasiya ilə məşğul olurlar və onların 97%-i tamamilə səhv üsullarla bunu edirlər. Səbəb isə çox sadədir: mahiyyət dərk edilmir. Mahiyyət dərk edildikdən sonra bəzi texniki modellərlə dəstəklənir və nəticələr əla olur. Bunu etmək üçünsə meditasiya anlayışını izah edən kitablar və ustadlarla tanış olmaq lazımdır. Deməzdim ki, bu anlayışı izah edən ustad azdı, buna baxmayaraq hər bir insanın başa düşə biləcəyi dil fərqlidir. Həm dil fərqlidir, həm də hər bir insana individual olaraq meditasiya modeli var. Bunu insan özü tərtib edir. 

Elə bu məqamda Şərq və Qərb arasında olan əlaqəsizlik ortaya çıxır. Yüz illərdir Tibet rahibləri meditasiya və özünüdərk üsullarını öyrənirlər, lakin beyin və insan orqanizminin funksiyaları haqqında ibtidai səviyyədə belə biliklərə sahib olmamışlar. Eləcə də Qərb yüz illərdir material mövzularda baş sındırır, lakin material problemlərin həll yolu kimi mənəvi həllərdən bixəbərdir. Məhz ona görə də Mingür Rinpoçenin bu kitabı müasir dövrümüzdə mövcud olan çox dəyərli bələdçilərdən hesab edilməklidir. Kitab öz təbii dili ilə zövq oxşamaya bilmir. Həm elm, həm ruhi yol, həm də metaforik rəvayətlər, əfsanələr və hekayələr. Şərq və Qərb arasında olan yeni, mümkünsüz hesab ediləcək körpü. Müasir problemlərin yeni həlli.

Əgər bir addım geri çəkilib vəziyyətə daha obyektiv baxmağa imkanımız olsa görərik ki, bizi narahat edən şəxs, bizə heç bir aidiyyatı olmayan məsələlərdən əziyyət çəkir. 

Kitabda din, anlaşılmaz sözlər və ezoterika yoxdur. Bilməli olduğunuz yeganə terminlər MRT və neyrofiziologiyadır. Bu qədər sadə. İnsan, sanki, yaxın bir dostundan həyati vacib mələlərlə bağlı biliklər əldə edir. İnsanın biliklərə tam açıq olduğu vəziyyət onun sadəcə çox yaxın dostu ilə edəcəyi söhbət əsnasında olur. Mövzu ilə bağlı birmənalı şəkildə məsləhət bildiyim kitabdır. Niyyətiniz olsa, sadəcə özünüzü kitabın axınına buraxın və qoy o sizi dəyişdirsin. Mingür Rinpoçe ilə yaxından dostlaşın və icazə verin öz bilikləri ilə sizinlə bölüşsün və heç vaxt unutmayın: insan müdrikliyə can atır. Müdriklik isə hər zaman özüylə bərabər xoşbəxtlik gətirmir. Xoşbəxtlik bəxş edən biliklər əldə etməyə çalışın. Bu yolda isə bu kitab bir növü qızıl standartdır.