Qravitasiya - Gravity - Гравитация

          Doktor Rayn Stoun tibb mühəndisliyi sahəsi üzrə gözəl mütəxəssisdir. Leytenant Mett Kovalski adlı veteran astronavtın rəhbərliyi altında kosmosa yola düşən doktor, çıxılmaz vəziyyətlərə düşür. Kovalski üçün bu missiya təxrisdən qabaq son missiya olacaqdı. Lakin baş verən zəncirvari qəzalar onları soyuq, qaranlıq və nəhəng açıq kosmosda yalnız qoyur. Yerlə əlaqə itir. Çıxış yolları axtaran doktor Stoun inanılmaz hərəkətlər edir. Özünü toplayır və içindəki həyatın çığırtısına, yaşamaq hayqırtısına qulaq verir. Bütün bunları izləmək istərdinizmi? Bu yazılanlar sadə görsənə bilər, amma mükəmməl vizualizasiya izləyicini son anadək qəhrəmanların talelərinə görə qorxu və həyəcanda saxlaya bilir ki, bu da uğurlu nəticədən xəbər verir.

         Filmin qəhrəmanları hansı hissləri keçirirdilərsə mən də onlara paralel həmin hissləri hiss edirdim. Etiraf edim ki, bu məndə film izləyəndə heç də tez-tez olan şey deyil. Öz-özümə sual verməyə bilmirdim ki, görəsən onlar xilas olacaqlar? Film insanı həm özüylə, həm də ətrafında olanlarla dialoqa getməyə vadar edir.

         Gözləntilərə cavab vermək baxımından onu deyə bilərəm ki, mən qravitasiya anlayışını dərindən dərk etdim. Bunun üçün film kifayət qədər izləyiciyə köməklik göstərir. Filmi izlədikcə başa düşdüm ki, filmdə kosmos sadəcə fon kimi istifadə olunub. Əslində isə film dramadır – insanın yalnızlığı, həyatının mənasını axtarması və çarəsizlik Sandra Bullokun canlandırdığı obrazda öz təzahürünü tapır. Corc Kluninin ifa etdiyi personaj isə, heç vaxt özünüidarəni itirməyən, təmkinli, optimistik missiya rəhbəri – leytenant Kavalskidir. Kluninin ekran vaxtı az olsa da, öz yumor hissi ilə yaddaşlarda olduqca canlı və unudulmaz obraz kimi qalır.

         Filmi böyük ekranda – kinoteatrlarda izləmək daha məqsədəuyğundur. Çünki vizual effektlərin və Yer planetinin gözəlliyini məhz böyük ekranda yaxşı görmək olar.

         P.S. Amerikan filmi olaraq film özünü tam doğruldur. Çünki filmdə baş verən faciənin kökündə ruslar dayanır.