Salam, Nyu York! - Салам, New York

"Salam, Nyu York!" bir qırğız gəncinin "Amerika arzusu" arxasınca dünyanın ən böyük meqalopolisinə  necə getdiyini göstərən pozitiv və səmimi ekran əsəridir. 

Hər bir gənc kimi Batır da savadlı və uğurlu insan olmaq arzusundadır. Lakin sadəcə arzulamaq deyil, arzular uğrunda əziyyət çəkmək lazımdır. Film də mahiyyəti etibari ilə məhz bu məqamı əks etdirir. Odur ki, kənardan beyinlərdə yaranan "qırğız filmi nə dərəcədə maraqlı ola bilər?" stereotipini kənara qoyub, filmin özündə ehtiva etdiyi maraqlı və önəmli dəyərlər haqqında söhbət açmaq istərdim. 

Hansı ölkədə olursunuzsa olun, xüsusilə də ABŞ-da, uğurun əsas qiyməti sizin ağlınız və özünüzə qarşı olan inamınızdır. Batır qabyuyan və fəhlə kimi işlədiyi vaxtlarda savadını inkişaf etdirməyi unutmurdu. Daima öz üzərində çalışırdı və bunun müqabilində "Nyu York" onu mükafatlandırdı: Kolumbiya Universitetindən məzuniyyət, yaxşı yerdə iş, gözəl qadın və səmimi dostlar. Bütün bunlar bir gəncin həyata inamla addımlaması üçün ən əhəmiyyətli bünövrə daşlarıdırlar. Lakin filmin sonunda biz görürük ki, Batır valideynlərinin dara düşməsi xəbərini eşidir və bəzi şeylərdən imtina edərək vətəninə qayıdır. Məhz bu məqamda biz qərb cəmiyyəti ilə post sovet cəmiyyətlərinin fərqini bir daha əyani olaraq görürük. Bir daha yadımıza salırıq ki, biz necə də vəhşi cəmiyyətlərdə yaşamağa məcburuq. Hələ də bizim kimi cəmiyyətlərdə çox şey fiziki güc, yalan, saxtakarlıq, murdar oyunlar və vəzifədən sui-istifadə vasitəsi ilə həll olunur. Zamanla sadəcə pulun marjinalizmi artır, insanların mədəni və şəxsi keyfiyyətləri isə inanılmaz dərəcədə zəif sürətdə artır və ya ölü nöqtədə qalır. 

Film bizə göstərir ki, insan  xarici ölkədə varlana və böyük nailiyyətlər əldə edə bilsə də, həqiqi xoşbəxtliyi doğmalarının, əzizlərinin yanında tapa bilər. Ailə və doğma insanlarsız insan daima daxilindəki boşluqla mübarizə aparmalı olacaq. Doğma insanların mənəvi dəstəyi olmadan insan özündə özünəinamı tapa bilməz. Hər nə qədər material təminat arxasınca insanlar dünyanın müxtəlif ölkələrinə təşrif etsələr də, yaxınların başına gələn problemlər onlara rahatlıq verməz. Film bütün bu ideyaları məqamları olduqca gözəl üslubda izləyicilərə çatdırır. 

"Salam, Nyu York!" olduqca səmimi və rahat auralı bir filmdir. Filmdə möhtəşəm ssenari və aktyor ifası tapa bilməsəniz də, filmin adının ilk sözü olan "salam" sözü bizə onu doğmalaşdırır. Əlbəttə ki, qırğızlarla bizim aramızda olan yaxın münasibətlər də öz sözünü deyir, amma müasir cəmiyyətimizin dəyişən meyilləri daha çox özünü bu istiqamətdə biruzə vermir. Odur ki, səmimi və pozitiv film izləmək istəsəniz, məncə, tərəddüt etmədən aşağıdakı keçidi istifadə edərək izləyin.