1+1 - Intouchables - Неприкасаемые

         Qəza nəticəsində əlil qalmış aristokrat Filipp, onun qayğısına qalmaq üçün işçi götürür və bunun üçün də bu işə ən az uyğun gələn, həbsxanadan yenicə azadlığa çıxmış Drissi seçir. Bu seçim sidq-ürəkdən gələn seçimdir. Filipp Drissdə ona lazım olanı hiss etməyi bacarır. Driss Filipin hər dəqiqəsi ölçülüb-biçilmiş və çərçivələnmiş həyatına bir xeyli macera qatır. Driss Filippə göstərir ki, hətta əlil arabasında olsa da, qeyri-adi ad günü, yüksəksürətli maşın sərgüzəşti və hətta gözəl qadınla görüş sayəsində həyat gözəl ola bilər.

         Film möhkəm dostluq haqqındadır. Var-dövlət və hətta mənəviyyat, savad baxımından zəngin olan Filipp, qəza nəticəsində əlil olsa da, onun əllilliyi bəlkə də onu bədbəxt etmir, amma sevdiyini itirəndən sonra onun həqiqi dostluğuna ehtiyacı var idi. O dostluq ki bir-birilərini yarım kəlimədən anlayırlar. Driss və Filipp birlikdə böyük mənəvi güc, gənclik, mobillik, intellekt və yumor əmələ gətirirlər. Xüsusiylə yumorun üzərində dayanmaq istərdim. Filmdə güldüyüm zaman ürəkdən, hansısa ucuz "kamedi klab" məhsulu olmayan, həqiqi intellektual yumorun nəticəsində yaranmış yumora güldüm. Drissin hər hərəkəti Filippin simasında gülüş yaradırdı (hələ üstəlik onlar operada olanda Drissin reaksiyasına mən o qədər yüksəkdən güldüm ki, mümkündür ki qonşular da eşitsin).

         Razılaşarsız ki, kinematoqrafiya və roman biznesində biri ölümcül xəstə və ya əlil obraz olmaqla iki obrazın bir-birilərinə ya sevgi, ya da dostluq münasibəti bəsləmələri haqqında bir çox nümunələr var. Belə dramatik, tragik nümunələrə artıq doysam da, filmdə artıq, lazımsız bir şey tapmadım. Əksinə qəhrəmanların sifətlərindəki emosiyaları bir-bir oxuduqca rejissor işinə heyran qaldım. Diqqətlə baxanda belə başa düşürəm ki, filmin nə başlanğıcı var, nə razvyaskası, nə də sonluğu var. Film bizə sadəcə axıb gedən həyatı göstərir. Bizim üzərimizə düşən filmin hər dəqiqəsindən zövq almaq düşür.

         Gözəl, mehriban atmosfer, musiqi, yumor və qəhrəmanların real prototipləri ilə olan kadrlara görə təşəkkür!

Filmi izlə