Manyak / Маньяк / Maniac - 2012

         Los-Ancelesin küçələri sakit və təhlükəsiz görsənsə də, bu belə deyil. Gecələr Frenk əlində skalpel ova çıxır. Onun uşaqlıqda aldığı psixoloji travmaların əziyyətini günahsız insanlar çəkir. Onun daxili dünyası qorxulu və qaranlıqdır. O, özü də qorxur. Həyatına sevgi daxil olsa da, onu başa düşə bilmir. Dəyişmək istəsə də alınmır. Manyaklık əslində nədir?       

         Filmi izlədikdən sonra şəxsən məndə hər hansısa xüsusi hisslər yaranmadı. Filmin qəhrəmanı tamamilə psix, manyakdır. Film onun gözləri ilə çəkilib. Başqa sözlə Elaydja Vudu biz ekranda çox az görürük. Məhz buna görə elə bir an yaranır ki, izləyici hiss edir ki, sanki, özü bütün bu qəssablıq prosesində iştirak edir (opretor işi yüksək səviyyədədir).

         Baş qəhrəman - Frenkdir. O, cansız maneken kuklaların arasında yaşayır və ailə biznesini davam etdirir. Onların arasında özünü təhlükəsiz hiss edir. Gündüzlər normal insan kimi görünmək üçün əməlli başlı dəridən-qabıqdan çıxır. Onun həm fiziki xəstəliyi - miqren, həm də psixi xəstəliyi - manyaklığı var. Onun qatil-manyaka çevrilməsinin psixoloji aspektləri olduqca maraqlıdır. Belə ki, filmdə onun keçmişi, başqa sözlə uşaqlığı ilə əlaqədar epziodlar verilirdi və bu epizodlarda anasının yad kişi qrupları ilə cinsi əlaqəda olduğu göstərilir. Əksər hallarda da Frenk kənarda durub izləyir. Bunun uşaq psixologiyasına necə də dağıdıcı təsir göstərdiyini başa düşmək üçün Ziqmund Freyd olmaq lazım deyil. Frenk bu travmaları ala-ala Los-Ancelesin küçələrini vahimədə saxlayan qatil-manyaka çevrilir. Onun ruhi ağrılarının səbəbində uşaqlığı yatsa da, fəsadları sonradan üzə çıxır. Bütün bu zərbələr toplanır və nəticədə Frenk daxilində yerləşən, öz dəyərləri və prinsipləri olan dünyada yaşamağa qərar verir. Elə bu zaman onun "qaranlıq tərəfi" onun üzərində hakimiyyəti ələ keçirir. Belə ki, onun qaranlıq tərəfi üçün xeyir və şər anlayışları tamamilə fərqlidir və onun üçün ətraf dünya irreal, daxili dünya isə realdır. Eyni zamanda Frenkdə şizofreniya əlamətlərini də rahatlıqla görmək olur. Şəxsiyyət ikiləşməsinə isə bir addım qalır. Belə insanlar düzələ bilər. Bu mümkündür.  Ətrafında olan insanlar tərəfindən sevgi və səmimiyyət onları normallaşdıra bilər. Ona görə də Anna ilə tanışlıq Frenkin daxilində mübarizəyə başlanğıc qoyur. İşıqlı və qaranlıq tərəflərin mübarizəsi. Anna ilə tanışlıq onu dəyişdirə biləcəkmi?     

         Həmişə hesab etmişəm ki, filmlər və kitablar özlərində ağır psixoloji yük daşımalıdırlar ki, insanlar onları izlədikdən və ya oxuduqdan sonra öz üzərilərində işləsinlər. "Manyak" musiqisi, süjet xətti və psixoloji aspketləri ilə diqqətəlayiq qatil-şizofrenik-manyak filmidir. Film şəxsən mənim üçün yaddaqalan oldu. Bilmirəm niyə, amma film haqqında çox tez-tez düşünürəm. Belə hallar məndə az-az olur.