Üç Samuray
Samuraylığın ən əsas qaydasını heç vaxt unutmamışdım: Samuray daima
ölümü düşünməldir. Gallus deyib ki, qaçılmaz bəlaya anidən düçar olmaq, uzun
müddət qorxu əzabları çəkməkdən yaxşıdır. Öyrəndiklərimə görə seppukuda
bağırsaqlar çölə fışqıraraq dözülməz ağrılar verir. Mən həmişə ağrılara qarşı
aciz olmuşam. Səbəbi isə dünyaya təbii yolla gəlməmək olub. Həyatın ilk ağrı və
çətinliklərini görməmişəm. Həyatımın ilk anında görmədiyim ağrıları həyatımın
son anında görmək istəyirdim. Bu ağrıdan can qurtamaq mümkün deyil. Sonradan əmələ
gələn dözülməz ağrılar isə seppukudan uzun müddət öncə başlayıb daxilimdə. Bu
ağrılar bağırsaqlarım kimi içimdə bir-birinə dolanıb yuva qurub. O yuvanı
dağıtmalıyam. Yalnız o zaman ətrafımdakı büllur kədər, tənhalıq və soyuqluq
illüziyazı dağılacaq. Mən qorxmuram daha. Geriyə baxmıram. İrəli anlayışını
unuduram. Son olaraq qılıncı dərinliyə itələyəndə, çox çox uzaqda, lakin
getdikcə yaxınlaşan üç samurayı görürdüm. Uzun kimanoları və yanlarından
asılmış qılıncları ilə sakura ağacının altında mənə tərəf gəlirdilər. Uzaqda
qürub edən günəş qırmızımtıl rəngdə məni gözləyirdi. Mən dördüncü idim. Sadəcə
unutduğum səbəblərə görə ayrılmışdım onlardan. Çox güman ki, növbəti
missiyadaydım. Üzlərində heç bir ifadə yox idi. Nə gülümsəmə, nə də kədər. Üç
samuray həyatımın ən son xatirəsi oldu. Geriyə qalanı onlara həvalə etdim.
Onlara inanırdım və inanmaq məcburiyyətindəydim. Mənim məqsədim ancaq özümü öyrənməkdir.
Başqalarına zərər vermərəm. Sərhədlər aradan qalxır və ətrafda sarı rəngdə
panikada ora-bura uçuşan kəpənəklər və onların melodik pıçıltıları eşidilirdi:
“Bu dünya onsuz da illüziyadır”. Bu məndə başlayıb məndə də bitən, ruhumun
kainata sığmayan miqyasına qərq olmaqdır. Mən özümə dərs verməliyəm. Mən təcrübə
qazanıb yetkinləşməliyəm. Digərləri də bundan dərs çıxara bilər. Fırtına məni
haralara atsa, mütləq orada yaşanılası bir yer vardır.
İbrahim Niftiyev, 31.05.13
Comments
Post a Comment