Niftiyevin bloqu

Bu podkastda Avropa Yenidənqurma və İnkişaf Bankının yeni keçid hesabatını dəyərləndirdim.

"Bitmiş münasibətlər muzeyi" Niftiyevin bloqunda ilk hekayə-podkastdır. Cari material mənim 2022-ci ilin dekabr ayında Zaqreb şəhərinə etdiyim səyahətdən ilham alaraq hazırlanıb. Təsvirlər tamamilə real hadisələr və bədii çalarların sintezi əsasındadır. Başqa sözlə, bu işi dinləyərək həm həqiqətdə mövcud olan "Bitmiş münasibətlər muzeyi" haqda məlumatlar əldə edəcəksiniz, həm də mənim şəxsi təəssüratlarımı və qiymətləndirmələrimi eşidəcəksiniz. Bütün dinləyənlərə öncədən təşəkkür edirəm! Qeyd: dinləyərkən qulaqlıqdan istifadə etmək məsləhətdir.

Fəlsəfə bəşəriyyətin sahib olduğu ən qəribə və ən mühüm şeylərdən biridir. Fəlsəfə insanlara çox şey bəxş edib və onu daim nəzər-diqqətimizdə saxlamalıyıq. Gənc filosof və fəlsəfə təhsili alan birisi kimi Əhməd Həmidlə söhbət etmək bu baxımdan çox maraqlıdır. P.S. Texniki səbəblərə görə səs keyfiyyəti bir qədər aşağıdır.

Budəfəki audio-podkast Kanada ilə əlaqədardır və qonağım dəyərli Gülər Qasımova oldu. Kanadaya miqrasiya, orada təhsil və gündəlik həyatın gizlin qalmış yönlərini müzakirə etdik və mən də öz növbəmdə dörd il yarımlıq xaricdə yaşamaq təcrübəmlə müqayisələr apardım. Kanada çoxlarının marağında olan bir ölkədir və son dövrlərdə azərbaycanlıların sıx miqrasiya etdiyi yerdir. Əminəm ki, Kanada və ümumiyətlə miqrasiya haqda hələ bilmədiyimiz şeylər çoxdur. Odur ki, bu audio-podkast çoxları üçün faydalı ola bilər. Dəvətimi qəbul etdiyi üçün Gülərə çox minnətdaram və bütün işlərində ona uğurlar arzu edirəm.

"Loudermilk" digər sitkomlardan fərqlidir. İlk növbədə, o qaranlıq komediya janrındadır. Düşündürücülüyü və realizmi izləyiciyə olduqca xoş təsir edə bilərsə də, heç də hamı tərəfindən bəyənilməyə bilər. Son dövrlər izlədiyim ən yaxşı komedik serialdır. Ətraflı yeni audio-podkastımda danışdım. 

Bu audio-podkastda həmsöhbətim Seqed Universitetinin iqtisadiyyat üzrə doktorantı Vüsal Əhmədovdur. Vüsal bu yaxınlarda "Croatian Economic Review" elmi jurnalında dərc etdirdiyi məqaləsi ilə Cənubi Qafqaz və Vişeqrad regionlarını əməyin məhsuldarlığı, struktur dəyişikliyi və iqtisadi siyasət perspektivlərindən qiymətləndirib. Düşünürük ki, mövzu təkcə iqtisadçılar və biznes mütəxəssislər üçün deyil, həm də Cənubi Qafqaz regionunu ona olduqca yaxın Mərkəzi və Şərqi Avropa regionu ilə müqayisəli şəkildə başa düşmək istəyənlər üçün də maraqlı olacaq. Vüsalın məqaləsinə keçid aşağıda yerləşdirilib. Structural Change and Economic Growth in Visegrad and South Caucasian Countries  -  https://hrcak.srce.hr/clanak/417778  yaxud da  ResearchGate  platformasında.

"Niftiyevin bloqu" bu aduio-podkast ilə Almaniyada yaşayan parlaq gənclərimizdən olan Cələl Hüseynbəyli ilə olan səmimi söhbəti təqdim edir. Onunla Almaniyada təhsil, yaşamaq və iş təcrübəsi haqda müzakirələr apardıq. Bəzi stereotiplər və gündəlik həyatın az bilinən yönlərinə işıq tutduq. Cəlal olduqca intellektual və çoxşaxəli tərzdə öz Almaniya təcrübəsini bölüşdü. Düşünürük ki, bu audio-podkast Almaniyada yaşamaq istəyənlər üçün maraqlı gələcək və orada yaşayanların da marağına səbəb olacaq. Maksimum dərəcədə sərbəst və səmimi mühitdə hazırladıq ki, dinləyicilər maraqla dinləyə bilsinlər. 

  Xarici dil öyrənmək, ələlxüsus da söz bazasını zəginləşdirmək və müəyyən vacib məqamlar haqqında bu podkastı hazırladım ki, məndən tez-tez soruşulan bəzi sualları cavablandırmış olum. Əlbəttə ki, insan zəhmətinin yerini hər hansısa qeyri-adi metod və ya üsul tuta bilməz. Yenə də müəyyən şeylər sizə faydalı ola bilər. Odur ki, aşağıdan podkastı dinləyə bilərsiniz. 

  Bu audio-podkast günbəgün dəyişən əmək bazarı tələblərinə dair nəhəng onlayn kurs platformalarından olan Coursera-nın dərc etdiyi hesabatın ümümi qiymətləndirməsidir. Çalışdım ki, hesabatın əsas məğzini azərbaycan dilində qısaca xülasələşdirim. Düşünürəm ki, bu mövzu postpandemiya və beynəlxalq hərbi münaqişələr dövrünün özü ilə birlikdə gətirdiyi çox ciddi makroiqtisadi qeyri-sabitlik dövründə olduqca aktualdır. Hesabatın başlığı: The Job Skills 2023: The Fastest-Growing Job Skills for Businesses, Governments, and Higher Education Institutions (hesabat əsasən bizneslər, tədqiqatçılar və hökümət nümayəndələri üçün əlçatandır).

Bu audio-podkastda Seqed Universitetinin kompüter elmləri üzrə doktorantı və gənc tədqiqatçısı Ülvi Şəkixanlı ilə kriptovalyutalar və onların ticarətinə dair bəzi məsələləri müzakirə etdik. Bu sahənin mütəxəssisi olmasaq da, Ülvi Şəkixanlının şəxsi təcrübəsi bir çox məqamlara aydınlıq gətirmək üçün çox faydalıdır. Odur ki, əgər növbəti suallar sizi də düşündürürsə dinləmək üçün çox gözləməyin: Kriptovalyutalar nədir? Bu sistemin riskləri, qazancları və etibarlılığı hansı səviyyədədir? Yeni başlayanlar nələrə fikir versinlər? Kriptovalyutaların ümumilikdə perspektivləri nələrdir və Azərbaycan üçün əhəmiyyəti nədir? Kimlər bu işlə məşğul olsun/olmasın? və s. Podkastın bu mövzu ilə maraqlananlar və kriptovalyuta ticarətinə yeni başlayanlar üçün maraqlı gələcəyini düşünürük. Dinlədiyiniz üçün öncədən təşəkkür edirik. 

"Cəmiyyət onsuz da məhvə doğru gedir..." cümləsi əsas obrazın dilindən səslənən və "Too Old to Die Young" adlı qəribə serialın məğzində dayanan əsas ideyadır. Ekran işi çox diqqətəlayiqdir və inanılmaz dərəcədə düşündürücüdür. Eləcə də, hesab edirəm ki, qeyd olunan deyanın çox dərin müasir fəlsəfi bünövrəsi var. 

Farkas Beata - Models of Capitalism in the European Union: Post-Crisis Perspectives Professor Beata həm mənim müəllimim olub, həm də hazırda üzvü olduğum  tədqiqat institutunun rəhbəridir. Müəllifi olduğu bu kitab isə Avropadakı kapitalizm modellərini başa düşmək üçün çox gözəl vəsaitdir. Kitabı tamamladıqdan sonra mən tam əmin oldum ki, iqtisadiyyatdakı "kapitalizmin növləri" ədəbiyyatı və araşdırmaları çox böyük əhəmiyyətə malikdir, çünki adıçəkilən istiqamət bizə ölkələri və cəmiyyətləri düzgün və dolğun başa düşməyə kömək edir. Belə kitabların mütaliəsi oxuculara tam fərqli üfüqlər  bəxş edir. İqtisadi təhlillərin adətən ölkə kontekstində olması, ölkələri bir-birindən fərqləndirməyi də qaçılmaz edir. Uzun-uzadı xırdalıqlara varmadan bu kitabı hamıya məsləhət görürəm. İstifadə olunan ədəbiyyatlar və tətbiq edilən metodologiya çox maraqlı və anlaşıqlıdır (əsasən klaster analizi tətbiq olunub və yaxşı vizualizasiya var).  Kitabı yüklə (PDF)

Vladimir Popov - Mixed Fortunes: An Economic History of China, Russia, and the West Son dövrlər oxuduğum və çox böyük zövq aldığım iqtisadi təhlil kitabı, rus iqtisadçısı Vladimir Popovun "Qarışıq talelər: Çinin, Rusiyanın və Qərbin iqtisadi tarixi" adlı əsəri oldu. Kitab çox anlaşıqlı dildə adıçəkilən regionların müasir iqtisadi quruluşlarını tarixi təkamül nöqteyi-nəzərdən, əsasən institusional iqtisadiyyatın prizmasından qiymətləndirir. Zənnimcə, çox anlaşıqlı dildə yazılan kitab müəllifin iş təcrübəsi ərzində yazdığı elmi məqalələrin genişləndirilmiş variantıdır. Ən əsası isə, kitab son dövrlərdə ifrat ekonometrikləşən iqtisad elminin tarixi-mədəni kontekst təhlilindən uzaq düşməsi tendensiyasına qarşı çox sanballı cavab kimi qəbul edilməlidir. 

"İqtisadiyyat kitabları" adlı silsilə yazılarımda sizinlə oxuduğum və məsləhət gördüyüm elmi kitablardan bəhs edəcəyəm. Bacardıqca onları necə əldə etməli olduğunuzu da bölüşməyə çalışacam. 

Ötən ilin (2018) sonlarına yaxın Serqey Dovlatovun əsərləri ilə tanış olmağa başladım. Heç xatırlamıram bu necə baş verdi. Olsa bilsin kitablarının kiçikhəcmliliyi diqqətimi cəlb elədi, ola da bilsin çox-çox əvvəllər dost-tanışların məsləhətlərini yerə salmamağa qərar verdiyimdən oldu. Yazıçıdan oxuduğum ilk kitab isə "Kompromis" oldu. Əsər məndə çox dərin təəssüratlar buraxdı. 3 gün ərzində böyük həvəslə və maraqla oxuyub bitirdim. Kitabın məğzi belədir ki, yazıçı Estoniyadakı jurnalist karyerası müddətində başına gələn gündəlik hadisələri böyük yumor hissi və xırdalıqlarla təsvir edir. Elə bilərsən ki, sovet dövrünün Estoniyasına getdin və gəldin. Adətən belə janrlı kitabların darıxdırıcı olmaq ehtimalı heç də az olmur, lakin Dovlatov tamamilə fərqli və ecazkar ədəbi yazı üslubu ilə, bir növ, mənim gözümdə bu janra yeni nəfəs bəxş etdi. Çox xoş təəccüblənmişdim. Ona görə də başa düşdüm ki, birmənalı olaraq onun digər kitablarını oxuyacam. 

"Filip K. Dikin Elektrik Yuxuları" və ya sadəcə "Elektrik Yuxular" (Electric Dreams) məşhur Filip K. Dikin elmi-fantastik hekayələr antologiyası əsasında ekranlaşdırılmış serialdır. Yazıçının işinə bələd olduğuma görə, bu serialı da izləməyə bilməzdim. Çoxlarımız isə "Minority Report", "Total Recall", "Blade Runner" və s. kimi dünya şöhrətli filmləri izləmişik. Həmin filmlər də Filip K. Dikin əsərləri əsasında çəkilib. Bu səbəbdən, gözləntilərimizi dügün hesablamaq o qədər də çətin olmayacaq. Bu yazıda mən, 10 bölümdən ibarət serialın məni düşündürdüyü mövzular çərçivəsində öz qeydlərimi bölüşəcəm (Əfsuslar olsun ki, yazının müəyyən hissələri bəzi bölümlərlə əlaqədar spoylerlər də daxil olmaqla yazılıb. Bəzilərində isə fikrimi spoylersiz təqdim etməyə müvəffəq olmuşam.).